Nóg komið af innistæðulausu „hjali“ um hagstjórn

„Almenningur á að gera þá kröfu til stjórnmálastéttarinnar að hún lofi ekki útgjöldum sem hún hefur ekki safnað fyrir eða skattalækkunum sem eiga að borga fyrir sig sjálfar. Öll myndum við vilja betri þjónustu, án skattahækkana, og lægri skattheimtu, án þjónustuskerðingar. Þess háttar hjal er þó engu betra en ofannefnt tal um (ó)hagstæðar hagstærðir sem gripnar eru samhengislaust úr lausu lofti. Slík tegund af afstæðiskenningu er ávísun á óábyrga hagstjórn og eiga Íslendingar að vera komnir með nóg af slíku hjali í bili."

Þetta segir Tryggvi Guðmundsson, hagfræðingur og doktorsnemi í hagfræði við London School of Economics, í lok greinar sem birt er hér á Vísi, þar sem staða efnahagsmála er til umræðu og fræðilegar aðferðir til að meta hana.

Tryggvi segir að útfrá kenningum sem viðraðar eru bók þeirra Carmen Reinhart og Kenneth Rogoff, This Time Is Different, þá sé batinn hér á landi helst til hægari en gengur og gerist eftir fjármálakreppur. „Hver er þá niðurstaðan varðandi árangur sitjandi ríkisstjórnar varðandi efnahagsbatann? Fljótt á litið virðist batinn nokkuð í takt, þó ívið hægari, við það sem gengur og gerist eftir kreppur. Líta verður þó til þátta sem gætu skekkt myndina við slíkan samanburð svo sem umfang bankakerfisins, ytri aðstæður og breytt viðhorf stofnana á borð við Alþjóðagjaldeyrissjóðsins til fjármagnshafta," segir Tryggvi í grein sinni.

Greinina má í heild sinni lesa hér.