Spænskir bankar hætta að bera fólk út af heimilum sínum

Spænskir bankar hafa ákveðið að hætta við að bera fólk út af heimilum sínum eftir að viðkomandi hefur tapað fasteign sinni í hendur banka á nauðungaruppboði. Mun þetta sjálfskipaða bann við útburði fólks af heimilum sínum á Spáni gilda næstu tvö árin.

Ákvörðun þessi var tekin eftir að tveir einstaklingar sem misstu heimili sín frömdu sjálfsmorð þegar átti að bera þá út í síðasta mánuði.

Í frétt um málið á vefsíðu BBC segir að áætlað er að síðan að fjármálakreppan skall á árið 2008 hafi um 350.000 fjölskyldur verið bornar út af heimilum sínum á Spáni en fasteignamarkaður landsins hrundi fyrir fjórum árum og hefur ekkert náð sér á strik síðan.