Tom Watson gæti hugsað sér að vera fyrirliði Ryderliðsins

Hinn þaulreyndi kylfingur, Tom Watson, segir að hann myndi íhuga það alvarlega að taka að sér fyrirliðastöðuna fyrir bandaríska úrvalsliðið í næstu Ryderkeppni sem fram fer á Gleneagles vellinum í Skotlandi árið 2014. Watson, sem er 63 ára gamall. var fyrirliði bandaríska liðsins fyrir tveimur áratugum þar sem hann landaði sigri gegn Evrópuúrvalinu sem fyrirliði.

Watson var á meðal keppenda á opna ástralska meisataramótinu og var hann spurður um þessa hluti af fréttamönnum. „Ég hef ekki fengið formlegar fyrirspurnir, en það væri mikill heiður ef einhver myndi klappa mér á öxlina og spyrja hvort ég hefði áhuga. Ég tók þátt síðast árið 1993, og það væri gaman að fá tækifæri til þess að upplifa þessa keppni á ný," sagði Watson en hann var í bandaríska liðinu fjórum sinnum 1977, 1981, 1983, og 1989, auk þess sem hann var fyrirliði árið 1993 þegar bandaríska liðið sigraði á Belfry vellinum.

Evrópuliðið hefur titil að verja eftir ótrúlega endurkomu á lokakeppnisdeginum á Medinah.