HS Orka á markað sem fyrst

Jarðvarmi, félag 14 lífeyrissjóða, jók hlut sinn í HS Orku í 33,4% í gær. Það borgaði tæpa fimm milljarða króna fyrir. Féð á að nýtast í stækkun Reykjanesvirkjunar. Vilji er til að skrá HS Orku á markað sem fyrst.

Tilkynnt var um það í gær að Jarðvarmi slhf., félag í eigu fjórtán lífeyrissjóða, hafi keypt nýtt hlutafé í HS Orku fyrir 4,7 milljarða króna á genginu 5,35 krónur á hlut. Áður hafði Jarðvarmi keypt fjórðungshlut í fyrirtækinu á 8,1 milljarð króna, en þá voru viðskiptin á genginu 4,63 krónur á hlut. Jarðvarmi á nú 33,4% hlut í HS Orku en Alterra Power, sem áður hét Magma, á 66,6%. Samtals hefur Jarðvarmi greitt 12,8 milljarða króna fyrir eignarhlut sinn.

Þegar Jarðvarmi keypti upphaflega hlut í HS Orku 1. júní 2011 var deila félagsins við Norðurál vegna 150 MW orkusölusamnings til álvers í Helguvík frá árinu 2007 enn fyrir gerðardómi í Svíþjóð. Niðurstaða hans hefði getað haft lækkandi áhrif á kaupverð þess nýja hlutafjár sem Jarðvarmi gekk frá í gær ef hún hefði orðið neikvæð fyrir HS Orku. Niðurstaðan, sem var kunngjörð í desember síðastliðnum, var sú að orkusölusamningurinn ætti að standa en að hann verði að skila HS Orku viðunandi arðsemi, sem er sérstaklega skilgreind í niðurstöðunni. Þá hafnaði gerðardómurinn skaðabótakröfu Norðuráls á hendur HS Orku vegna vanefnda á samningnum.

Þar sem Jarðvarmi greiddi fullt verð í hlutafjáraukningunni í gær er ljóst að félagið túlkar niðurstöðu gerðardómsins sem jákvæða. Heimildir Fréttablaðsins herma að fjárfestingin sé staðfesting á því að Jarðvarmi telji að verðmæti HS Orku hafi aukist að undanförnu og að þeir vilji ná samkomulagi við Norðurál. Þá er það skýr stefna lífeyrissjóðanna að HS Orka verði skráð á innlendan hlutabréfamarkað sem allra fyrst. Samkvæmt heimildum Fréttablaðsins telja þeir þó það ekki raunhæfan valkost fyrr en búið verði að semja við Norðurál.

Fulltrúar HS Orku og Norðuráls hafa verið að funda að undanförnu til að reyna að ná saman í málinu. Með hlutafjáraukningunni í gær var eigið fé HS Orku aukið um 4,7 milljarða króna og telja eigendur fyrirtækisins það nú hafa fulla fjárhagslega getu til að standa við sinn hluta samkomulagsins við Norðurál, náist samkomulag um viðunandi verð. Fjármunirnir verða nýttir í stækkun Reykjanesvirkjunar úr 100 MW í 180 MW. Um er að ræða þriðja og fjórða hluta uppbyggingar Reykjanesvirkjunar.

Í kynningu sem Alterra hélt fyrir fjárfesta 6. janúar síðastliðinn var gert ráð fyrir að framkvæmdir við stækkun virkjunarinnar myndu hefjast á seinni hluta þessa árs og að þeim yrði að fullu lokið á fyrri hluta árs 2014. Öll virkjanaleyfi fyrir stækkunum liggja þegar fyrir. Í kynningunni kom einnig fram að stefnt væri að því að virkja um 50 MW af orku í Eldvörpum fyrir lok árs 2016.

Norðurál hefur hug á að byggja álver í Helguvík í fjórum áföngum. 150 MW af orku þarf í hvern áfanga og Norðurál hefur lýst því yfir að álverið verði ekki klárað nema að búið sé að tryggja orku fyrir tvo áfanga, alls 300 MW.

thordur@frettabladid.is