Stígandi í sölunni

Jólasýning með verkum margra þjóðþekktra listamanna stendur nú yfir í Smiðjunni Listhúsi að Ármúla 36. „Margir kaupa íslenska myndlist á þessum árstíma og því er talsvert að gera. Fólk vill gera fínt hjá sér og jafnvel breyta aðeins til. Málverk eru falleg og áberandi á heimilum og það er nokkuð algengt að hjón kaupi sér málverk saman og gefi sér í jólagjöf," segir Bjarni Sigurðsson, eigandi Smiðjunnar.

Bjarni segir að sala á íslenskri myndlist sé á uppleið eftir talsverða lægð í kjölfar bankahrunsins. „Það er stígandi í listaverkasölunni á þessu ári og mér finnst talsvert meira af dýrari verkum seljast en síðustu þrjú til fjögur ár. Myndlist eftir þekkta málara er góð fjárfesting, ekki síst í kreppu, og stenst tímans tönn," segir Bjarni.

Hann segir að gömlu meistararnir séu ávallt mjög vinsælir og sömuleiðis margir yngri listamenn. „Þetta skiptist nú nokkurn veginn jafnt hvað vinsældir varðar. Gömlu meistararnir eins og Kjarval, Þorvaldur Skúlason, Ásgrímur Jónsson, Svavar Guðnason og Hafsteinn Austmann njóta alltaf vinsælda og af þeim yngri má nefna Tolla, Sigurbjörn Jónsson, Valgarð Gunnarsson og Pétur Gaut."