Fyrri keppnishelgi Reykjavíkurleikanna heppnaðist vel

Fyrri keppnishelgi Reykjavíkurleikanna 2013 fór fram um helgina og endaði með sundlaugapartý og uppskeruhátíð í Laugardalslaug. Keppendur á Reykjavíkurleikunum 2013 eru tæplega 2.500 talsins en þar af eru 362 erlendir. Mörg met voru slegin og góður árangur náðist í öllum mótshlutum um helgina en mótinu lýkur síðan um næstu helgi.

Um helgina var keppt í 8 íþróttagreinum og er eftirfarandi stutt samantekt frá mótshöldurum um helstu úrslitum í hverri grein.

Sund fatlaðra

Sannkallað metaregn var í sundkeppni fatlaðra um helgina því slegin voru 14 Íslandsmet. Flest Íslandsmet slógu þau Jón Margeir Sverrisson, Thelma Björg Björnsdóttir og Kolbrún Alda Stefánsdóttir eða fjögur met hver. Stigahæstu sundmennirnir voru Ólympíumótsfarinn Jón Margeir Sverrisson og Pernilla Lindberg frá Svíþjóð.

Frjálsíþróttir

Besta afrek mótsins í frjálsíþróttum átti Aníta Hinriksdóttir en hún setti glæsilegt Íslandsmet í 800 m hlaupi og náði lágmarki á EM innanhúss. Stigahæsti karl keppninnar var Kevin Stadler frá Þýskalandi en hann keppti líka í 800 m hlaupi eins og Aníta.

Badminton

Sigurvegarar í elsta flokki badmintonkeppninnar voru þau Stefán Ás Ingvarsson og Margrét Jóhannsdóttir. Þau sigruðu bæði tvöfalt þ.e. í einliða- og tvíliðaleik en Margrét vann einnig silfurverðlaun í tvenndarleik.

Fimleikar

Keppt var í hópfimleikum á Reykjavíkurleikunum um helgina. Evrópumeistarar Gerplu sigruðu í kvennaflokki en lið Stjörnunnar fylgdi fast á hæla þeirra og varð í öðru sæti og Selfoss í því þriðja. Gerpla sigraði einnig í karlaflokki en lið Ármanns í blönduðum liðum.

Kraftlyftingar

Keppt var í bekkpressu í kraftlyftingakeppni Reykjavíkurleikanna. Keppnin var tvískipt, annarsvegar Íslandsmót og hinsvegar alþjóðlegt mót. Íslandsmeistarar urðu Fanney Hauksdóttir og Sigfús Fossdal en Sigfús sló Íslandsmet þegar hann lyfti 305 kg. Alþjóðlegu keppnina sigruðu Hildeborg Hugdal heimsmethafi og heimsmeistari og Alastair McColl silfurverðlaunahafi frá EM í bekkpressu.

Taekwondo

Margir erlendir íþróttamenn tóku þátt í taekwondokeppni Reykjavíkurleikanna en greinin var nú í fyrsta sinn hluti af leikunum. Keppt var í fjölmörgum þyngdarflokkum á mótinu. Í svokölluðum „best of best" bardaga mættust Daníel Jens Pétursson frá Selfossi og Serbinn Damir. Damir keppti á Ólympíuleikunum í London og hafnaði þar í 5.sæti og því erfiður mótherji fyrir íslenska landsliðsmanninn. Daníel Jens náði að standa vel í hárinu á Damir en beið þó lægri hlut 7-9.

Listhlaup á skautum

Stigahæsti keppandinn í listhlaupi á skautum var Vala Rún B. Magnúsdóttir. Í frjálsa prógramminu fékk hún hæstu einkunn sem hún hefur náð á sínum ferli, 94.94 stig. Þessi einkunn er glæsilegur árangur og með því besta sem sést hefur hjá íslenskum listskautara. Upplýsingar um sigurvegara í öllum flokkum keppninnar má finna á vef Skautafélags Reykjavíkur: http://skautafelag.is/list/?id=6849

Júdó

Rússar og Danir voru sigursælir í júdókeppni Reykjavíkurleikanna sem jafnframt var 40 ára afmælismót Júdósambands Íslands. Keppnin í opnum flokki karla var sérstaklega skemmtileg en þar sigraði Rússinn Victor Semenov. Hann mætti Ólympíufaranum Þormóði Jónssyni í úrslitaglímu og sigraði með armlás en Þormóður hafði áður unnið Tékkann Michal Krpalek í hörku glímu. Bæði Krpalek og Semenov hafa unnið fjölda alþjóðlegra móta og því var keppnin á heimsmælikvarða.

Það er margt spennandi framundan á Reykjavíkurleikunum 2013 í næstu viku. Fimmtudaginn 24.janúar verður ráðstefna um afreksþjálfun haldin í Háskólanum í Reykjavík í samvinnu við Íþrótta- og Ólympíusamband Íslands. Þrír erlendir fyrirlesarar munu þar flytja áhugaverð erindi. Föstudaginn 25.janúar fer fram keppni í kynningargrein leikanna sem eru hjólreiðar. Keppnin verður hjólreiðaeinvígi upp Skólavörðustíginn. Um næstu helgi verður síðan keppt í 10 íþróttagreinum auk þess sem haldin verður lokahátíð leikanna.