Bale: Æfi aukaspyrnurnar sérstaklega

Gareth Bale er að uppskera árangur erfiðis síns en hann skoraði bæði mörk Tottenham í 2-1 sigri á Lyon í kvöld - bæði beint úr aukaspyrnu.

Liðin mættust í fyrri viðureign liðanna í 32-liða úrslitum Evrópudeildar UEFA en síðari viðureignin fer fram í Frakklandi í næstu viku.

Sigurmark Bale kom í uppbótartíma, rétt eins og í sigri liðsins á Newcastle í ensku úrvalsdeildinni um helgina. Báðar spyrnur voru stórglæsilegar.

„Ég er mjög ánægður. Ég hef verið að æfa aukaspyrnur á æfingasvæðinu og skoraði svipað mark í síðustu viku. Bæði mörkin komu á góðum tíma," sagði Bale eftir sigurinn í kvöld.

„Lyon er með gott lið og við vorum ekki 100 prósent í kvöld, í fullri hreinskilni. Við virtumst svolítið þreyttir. En það mikilvægasta er að við unnum leikinn. Við eigum von á erfiðum leik í næstu viku en við ætlum okkur að taka þessa keppni alvarlega."