Terry: Ekki okkar besti leikur

Belginn Eden Hazard var hetja Chelsea í kvöld. Hann skoraði þá svakalegt mark nokkrum sekúndum fyrir leikslok og skaut Chelsea áfram í Evrópudeild UEFA.

Leikurinn var á leið í framlengingu er Hazard skoraði markið glæsilega.

"Við erum hæstánægðir með að vera komnir áfram. Þetta var ekki okkar besti leikur en við erum komnir áfram og gleðjumst yfir því," sagði John Terry, fyrirliði Chelsea, eftir leikinn.

"Við héldum áfram þó svo ekkert hefði gengið upp hjá okkur fyrstu 80 mínútur leiksins. Við fengum færi en þeir létu okkur hafa fyrir hlutunum.

"Við erum enn svekktir að hafa fallið úr leik í Meistaradeildinni en það hvetur okkur áfram í þessari keppni."