"Einstakt tækifæri"

Malaga sækir Dortmund heim í síðari viðureign liðanna í átta liða úrslitum Meistaradeildar Evrópu í knattspyrnu í kvöld.

Markalaust jafntefli varð niðurstaðan í fyrri leik liðanna á Spáni þar sem gestirnir frá Þýskalandi klúðruðu hverju færinu á fætur öðru. Fyrir vikið á Malaga góðan möguleika á að komast í undanúrslit keppninnar.

„Þetta verður einstakur leikur fyrir okkur enda mætum við einu besta liði Evrópu. Við erum staðráðnir í að halda áfram að skrifa söguna," segir Diego Lugano miðvörður Malaga. Félagið hefur aldrei áður komist í Meistaradeildina og nú er sæti í undanúrslitum handan við hornið.

„Þetta verður algjörlega stórkostlegt og við munum njóta hverrar mínútu. Við erum sannanlega þess megnugir að leggja Dortmund að velli," segir Roque Santa Cruz framherji liðsins.

Flestir telja Borussia Dortmund líklegra liðið í viðureigninni. Þýskalandsmeistararnir voru töluvert betri aðilinn í fyrri leiknum en tókst þó ekki að skora. Höfuðmarkmið Malaga fyrir þann leik var að halda fengnum hlut en Manuel Pellegrini, þjálfari liðsins, veit hvað til þarf í Meistaradeildinni.

Undir stjórn Pellegrini fór Villarreal afar óvænt í undanúrslit Meistaradeildar vorið 2006. Þar mætti liðið Arsenal og féll úr keppni. Juan Roman Riquelme klúðraði þá vítaspyrnu undir lok síðari leiksins en mark hefði sent Gulu kafbátana í úrslitaleikinn.

Pellegrini missti af blaðamannafundinum fyrir leikinn þar sem hann var í Chile við útför föður síns. Hann verður þó mættur á sinn stað á Westfalen í kvöld.

Stuðningsmenn gestaliðsins treysta á hið óvænta og dagblöðin spara ekki stóru orðin.

„Malaga býr sig undir dýrðina," er skrifað stórum stöfum á La Opinion de Malaga og AS lýsir leiknum sem „einstöku tækifæri".

Þrátt fyrir allt telja flestir að Dortmund eigi tiltölulega náðugt kvöld fyrir höndum. Jürgen Klopp, þjálfari liðsins, segir liðið vilja halda áfram góðu gengi í Meistaradeildinni í ár.

„Það eru tvær leiðir til þess að nálgast leik sem þennan. Annars vegar geturðu fundið fyrir pressunni eða þú getur hlakkað til. Síðari leiðin hefur farnast okkur vel."

Klopp sagði á blaðamannafundinum fyrir leikinn að hann hefði farið yfir fyrri leikinn með sínum mönnum. Hann sagði þeim að láta neikvæð ummæli um úrslitin úr fyrri leiknum sem vind um eyru þjóta.

„Ég skil ekki hvernig fólk geti reiknað með þægilegum sigri í Malaga. Leikur okkar í Meistaradeildinni hefur verið mjög jákvæður þar með talin frammistaðan í fyrri leiknum. Það gefur okkur samt ekki neitt."

Dortmund vonast til þess að endurtaka leikinn frá árinu 1997 þegar liðið fór alla leið og vann titilinn. Þeir hafa sýnt það í vetur að þeir eru til alls líklegir.

Leikur liðanna í kvöld hefst klukkan 18.45. Upphitun á Stöð 2 Sport byrjar hins vegar á slaginu klukkan 18.00.

Sportið á Vísi er á Facebook. Fylgstu með.