Mario Götze létti á sér á miðri æfingu

Mario Götze, leikmaður þýska liðsins Dortmund, hafði greinilega ekki tök á því að komast á salernið þegar hann æfði með liði sínu í vikunni.

Dortmund var að undirbúa sig fyrir leik gegn spænska liðinu Malaga í Meistaradeild Evrópu í vikunni. Liðið var á æfingu á heimavelli Malaga þegar að Götze stökk yfir auglýsingaskilti til að sækja bolta.

Hann nýtti tækifærið til að kasta af sér eins og sést á meðfylgjandi myndbandi. Í miðjum klíðum áttaði hann sig á því að það væri myndavél á honum en hann átti engra annarra kosta völ en að ljúka sér af. Sem og hann gerði.