PSG jafnaði í blálokin

Blaise Matuidi skoraði gríðarlega mikilvægt mark fyrir PSG í kvöld á lokasekúndum leiksins gegn Barcelona í átta liða úrslitum Meistaradeildar Evrópu. Það mark setur meiri í seinni leik liðanna sem fram fer á Spáni. Lokatölur í kvöld 2-2.

Heimamenn byrjuðu leikinn betur en það voru gestirnir frá Barcelona sem brutu ísinn. Að sjálfsögðu var það Lionel Messi sem skoraði.

Hann fékk stórkostlega sendingu inn í teig frá Dani Alves sem Messi kláraði af stakri snilld. Hann var þar með búinn að skora 59 mörk í Meistaradeildinni. Aðeins Raul hefur skorað fleiri mörk eða 59.

Þetta var þess utan fyrsta mark Messi í París. Hann er þar með búinn að skora í 20 borgum í Meistaradeildinni. Raul skoraði "aðeins" í 19 borgum. Messi varð síðan að fara af velli vegna meiðsla í hálfleik og veikti það eðlilega lið Börsunga.

Það gekk ekkert sérstaklega hjá PSG að þjarma að Börsungum í seinni hálfleik. Liðið skoraði þó mark tíu mínútum fyrir leikslok.

Zlatan kom þá boltanum yfir línuna eftir að skalli félaga hans hafði farið í stöngina. Zlatan var reyndar kolrangstæður og markið hefði aldrei átt að standa.

Börsungar létu það ekki á sig fá og tóku aftur forystuna skömmu fyrir leikslok. Þá fékk liðið vítaspyrnu sem Xavi skoraði örugglega úr. Klaufalegt brot hjá Salvatore Sirigu, markverði PSG.

Zlatan lagði svo upp mark á lokasekúndunum fyrir Matuidi. Hann skallaði boltann út til hans. Skotið var ekkert sérstakt en Valdes markvörður var kominn úr jafnvægi og boltinn lak inn.