Bjarki Freyr varð þriðji

Þríþrautarkappinn Bjarki Freyr Rúnarsson hafnaði í þriðja sæti af fjórum keppendum í flokki 18-19 ára á Evrópumeistaramótinu í ólympískri þríþraut í Tyrklandi í dag. Hann er fyrsti Íslendingurinn til þess að komast á pall á Evrópumóti í þríþraut.

Bjarki Freyr kom í mark á tveimur klukkustundum og ellefu mínútum. Hann var rétt rúmri mínútu á eftir Bretanum James Briscoe. Hinir þátttakendurnir í flokki Bjarka voru einnig breskir.

Bjarki var fljótasti hlauparinn af þátttakendunum fjórum en þriðji sterkastur í sundinu og hjólreiðunum.

Sigurður Ásar Martinsson hafnaði í 28. sæti af 38 keppendum í flokki 35-39 ára. Sigurður kom í mark á tímanum tveimur klukkustundum og átján mínútum.