Meiðslavandræði framherja Þór/KA halda áfram

Íslandsmeistarar Þór/KA hafa ekki haft meistaraheppnina með sér í sumar þegar kemur að meiðslum lykilmanna liðsins. Liðið varð fyrir enn einu áfallinu í Eyjum í kvöld þegar slóvenska landsliðskonan Mateja Zver þurfti að fara af velli eftir aðeins sex mínútna leik.

Þór/KA lék án landsliðskonunnar Katrínar Ásbjörnsdóttur í þessum leik alveg eins og í bikarleiknum á föstudagskvöldið og þá er markadrottningin Sandra María Jessen að komast aftur á fullt eftir langvinn meiðsli.

Shaneka Jodian Gordon var búin að koma ÍBV í 1-0 í leiknum tveimur mínútur áður en Mateja Zver meiddist en Söndru Maríu Jessen tókst að jafna leikinn á 11. mínútu. Bryndís Jóhannesdóttir kom ÍBV aftur yfir á 19. mínútu og þannig var staðan í hálfleik.

Upplýsingar um markaskorara eru fengnar af úrslit.net.