Nessvæðið í Laxá í Aðaldal til Hreggnasa

Það eru nánast fréttir daglega um breytingar á leigumálum laxveiðiánna þessa dagana og í dag er það ljóst að nýr leigutaki tekur við svæðinu kenndu við Nes.

Hreggnasi hefur innan sinna banda Laxá í Kjós, Grímsá, Korpu, Svalbarðsá, Fossá og núna hefur Nessvæðið bæst í hópinn.  Í fréttatilkynningu frá Hreggnasa segir: "Veiðifélagið Hreggnasi hefur tryggt sér veiðirétt að stórum hluta á Nesveiðum í Laxá í Aðaldal. Samningur þess efnis var undirritaður í dag, og tekur gildi strax fyrir sumarið 2014. Um er að ræða alla stangardaga síðari hluta sumars á þessu mesta stórlaxaveiðisvæði landsins.

Með þessu er Hreggnasi að tryggja aðkomu viðskiptavina sinna að Nesveiðum. Ljóst er að miðbik sumarsins mun allt fara á erlendan markað og að framboð veiðileyfa á innanlandsmarkaði mun verða mun minna en undanfarin ár.

Veiðisvæðin kennd við Nes, Árnes, Tjörn, Knútsstaði, Ytra-Fjall og Hólmavað eru sem áður segir einhver mestu stórlaxasvæðin hérlendis. Því til staðfestingar má benda á að nokkrir af allra stærstu löxum nýliðins veiðitímabils fengust á ofangreindum veiðisvæðum".

Nesið var áður hjá SVFR.