Ásgeir að standa sig vel í þýsku deildinni

Skotíþróttamaðurinn Ásgeir Sigurgeirsson er að standa sig vel með liði sínu TSV Ötlingen í þýsku Bundesligunni. Hann vann báðar sínar viðureignir í leikjum liðsins um helgina þar af vann hann efsta mann heimslistans í gær.

Ásgeir vann Tobia Steinberger í dag með 383 stigum á móti 376 og hjálpaði þar með TSV Ötlingen að vinna 4-1 sigur á Singoldschützen Großaitingen.

Í gær vann Ásgeir viðureign sína við Andrija Zlatic sem er í fyrsta sæti heimslistans. Zlatic keppir fyrir HSG Munchen. Ásgeir fékk 391 stig af 400 mögulegum en Zlatic 380 stig. Liðið hans Ásgeirs, TSV Ötlingen, tapaði hinsvegar leiknum fyrir HSG Munchen 1-4.