Túnfisksævintýri Íslendinga endar með ósköpum

Túnfisksævintýri Íslendinga í Mexíkó og Króatíu, undir merkjum Umami Sustainable Seafood, virðist vera úti. Nú, þremur mánuðum eftir að félagið lýsti því yfir að framtíð þess væri ótrygg, fá hvorki fjölmiðlar, hluthafar né kröfuhafar nokkur svör um stöðuna.

Þetta kemur fram í grein norska blaðamannsins Evu Tallaksen á vefnum Undercurrent News, sem sérhæfir sig í fréttum af sjávarútvegsfyrirtækjum.

Umami var stofnað af Óla Val Steindórssyni árið 2010 í gegnum fjárfestingafélagið Atlantis, sem hann fór fyrir og stofnaði ásamt öðrum. Óli hafði áður unnið í Japan, meðal annars hjá félaginu Stolt Sea Farm.

Atlantis, félag Óla Vals sem áður átti 62 prósent í Umami, varð gjaldþrota í janúar. Það skuldaði dótturfélaginu rúmlega 18 milljónir Bandaríkjadala, jafnvirði rúmlega 2,2 milljarða króna, í júní í fyrra.

Umami var orðið langstærsta túnfiskeldisfyrirtæki heims, að því er sagði í íslenskum fréttum fyrir nokkrum árum. Óli Valur sagði þegar árið 2010, þegar fyrirtækið keypti Baja Aqua Farms í Mexíkó, að það væri fjórum til fimm sinnum stærra en önnur í geiranum.

Óli Valur var forstjóri þangað til um síðustu áramót, þegar hann hætti fyrirvaralítið, að því er fram kemur í grein Tallaksen vegna misklíðar á milli hans og fjármálastjórans Tims Fitzpatrick, sem nú hefur tekið við sem forstjóri.

Fitzpatrick þessi svaraði ekki beiðnum Undercurrent um viðtal vegna málsins, sagðist í tölvupósti til vefjarins í maí ætla að svara síðar en sagðist svo 19. júní ekki geta tjáð sig af lögfræðilegum ástæðum, án þess að útskýra það frekar.

Umami er skráð félag en í grein Undercurrent er fullyrt að hluthafar og kröfuhafar fái engar upplýsingar um það hvernig félagið er statt – hvorki símtölum né tölvupósti sé svarað.

Sjö öðrum lykilstjórnendum félagsins hefur verið sagt upp án skýringa frá því seint á síðasta ári og Undercurrent fullyrðir að einungis þrír vinni nú í höfuðstöðvunum. Ekki náðist í Óla Val í gær.