Guðbjörg búin að vinna fyrsta titilinn með Potsdam

Guðbjörg Gunnarsdóttir var ekki lengi að landa fyrsta titlinum eftir að hún gekk til liðs við þýska stórliðið Turbine Potsdam nú um áramótin.

Liðið varð þýskur innanhússmeistari í dag eftir sigur á Frankfurt í úrslitaleiknum. Staðan að loknum venjulegum leiktíma var jöfn, 1-1, en Potsdam hafði betur eftir vítasyrnukeppni, 6-5.

Mótið fór fram í Magdeburg um helgina og tæplega fimm þúsund áhorfendur fylltu höllina fyrir úrslitaleik dagsins.

Potsdam lenti reyndar í vandræðum í riðlakeppninni eftir að hafa tapað fyrir bæði Essen og Leverkusen. Liðið vann þó Sindelfingen örugglega, 6-0, og komst þannig í 8-liða úrslitin.

Guðbjörg og félagar unnu þar 3-2 sigur á Jena og hefndu ófaranna gegn Leverkusen með 4-3 sigri í undanúrslitunum.

„Ég er ekki svo vön því að spila innanhúss. Í Svíþjóð og Noregi þar sem ég hef spilað undanfarin ár er lítið um innanhússfótbolta,“ sagði Guðbjörg í viðtali á heimasíðu Potsdam á dögunum. Guðbjörg hafði þá nýlokið æfingu með liðinu innandyra og taldi æfinguna hafa gengið þokkalega.

„Þetta var að minnsta kosti virkilega gaman,“ sagði Guðbjörg.