Kroos á leiðinni til Real Madrid

Toni Kroos, leikmaður þýska landsliðsins og Bayern Munchen, staðfesti eftir leik Þýskalands og Argentínu í gær í viðtali við brasilíska fjölmiðilinn UOL að hann væri á förum til Real Madrid.

Þrátt fyrir að vera aðeins 24 ára hefur Kroos leikið rúmlega 200 leiki fyrir Bayern Munchen í öllum keppnum. Gekk hann til liðs við Bayern þegar hann var 16 ára en ljóst er að átta ára dvöl hans hjá félaginu lýkur í sumar.

Kroos átti aðeins eitt ár eftir af samningi sínum hjá Bayern og hafði hann verið orðaður við flest af stærstu liðum Evrópu undanfarnar vikur. Hann vildi hinsvegar lítið tjá sig á meðan Heimsmeistaramótinu stóð en staðfesti loksins í gær að hann væri á förum frá þýsku meisturunum.

„Við hefðum ekki getað endað mótið betur. Nú get ég staðfest að ég er að fara til Madríd og það uppfyllir annan draum,“ sagði Kroos.