Tók kakkalakkana sína með til Íslands

Heldur undarlegir ferðafélagar voru í för ferðamanns á leið til Íslands með Norrænu á dögunum.  Var þar um að ræða þrjá stóra Madagaskar-kakkalakka í plastíláti.

Maðurinn kvað kakkalakkana vera gæludýr sem unnusta sín hefði endilega viljað að hann tæki með sér svo honum leiddist ekki dvölin á Íslandi. Tollverðir gerðu honum þá grein fyrir því að innflutningur dýra væri bannaður samkvæmt lögum, en að sögn þeirra tók hann því afar vel og hélt leiðar sinnar. Kakkalakkarnir urðu því af ferðalaginu.