Mjölnisstrákarnir tilbúnir í slaginn

Í kvöld munu þrír íslenskir bardagakappar stíga í búrið og berjast í MMA á Shinobi bardagakvöldinu. Bardagarnir fara fram í Wales og eru strákarnir tilbúnir í slaginn.

Þeir Bjarki Þór Pálsson, Birgir Örn Tómasson og Diego Björn Valencia munu í kvöld keppa fyrir hönd Mjölnis á bardagakvöldinu. Bjarki Þór berst um léttvigtarbelti Shinobi MMA bardagasamtakanna en hann er í aðalbardaga kvöldsins.

Jón Viðar Arnþórsson, formaður Mjölnis, er með í för en hann segir stemninguna í hópnum vera rosalega góða. „Við erum búnir að éta yfir okkur í dag (í gær). Fórum tvisvar á Nando’s og svo á Burger King,“ segir Jón Viðar en strákarnir gátu borðað að vild eftir að vigtuninni lauk í gærmorgun eftir vel útfærðan niðurskurð.

„Það eru 17 bardagar á bardagakvöldinu en Diego mun berjast um kl 19 og Birgir rétt á undan. Bardagi Bjarka er aðalbardagi kvöldsins og ætti að hefjast kl 23 að staðartíma,“ en klukkan er einum klukkutíma á undan í Bretlandi þannig að bardagi Bjarka ætti að hefjast kl 22 að íslenskum tíma.

Strákarnir munu taka því rólega í dag og slaka vel á fram að bardaganum. Kl 15 fara þeir í læknisskoðun og svo er reglufundur tveimur tímum seinna. Strákarnir hafa æft gríðarlega vel undanfarnar vikur en viðtal við Bjarka Þór má sjá hér að ofan.