Helgarmaturinn - Kínóa með steiktum sveppum og grænmeti

Auður Eva Auðunsdóttir snyrtifræðingur og jógakennaranemi ætlar að vera duglegri í hollu og góðu mataræði á nýju ári.

Hún segir móður sína hafa bent henni á áhugaverða síðu Margrétar Leifsdóttur heilsumarkþjálfa en þar sé að finna spennandi uppskriftir að ýmsum réttum en þessi uppskrift er einmitt frá henni. Kínóarétturinn er bragðgóður og stútfullur af næringarefnum sem við þörfnumst og ekki skemmir fyrir hve mettandi hann er.

Uppskrift

1 bolli kínóa (þess má geta að kínóa er mjög góður próteingjafi)

1 lífrænn grænmetisteningur

1 laukur

2 handfyllir niðurskornir sveppir

1 brokkólíhaus 

½ poki gulrætur

½ hvítkálshaus

olía til steikingar

Aðferð

Laukur skorinn smátt og steiktur úr góðri olíu í potti. Þegar hann er orðinn glær er kínóa, vatni og grænmetiskrafti bætt út í pottinn. Tekið af hellunni þegar kínóa er soðið og látið bíða.

Sveppir

Sveppir (helst íslenskir) sneiddir í þunnar sneiðar og snöggsteiktir. Kryddað með miklum pipar og smá maldonsalti.

Hvítkálsgrænmeti

Brokkólí og gulrætur steikt í nokkrar mínútur, síðan er niðursneiddu hvítkáli bætt í. Látið malla þar til hvítkálið er orðið mjúkt. Kryddað með óskakryddunum. Öllu blandað saman í eina skál og ristuðum furuhnetum stráð yfir.

Það er mjög gott að krydda réttinn með smávegis af tamari-sósu.