Metverð fékkst fyrir viskíflösku á uppboði

Dýrasta viskíflaska sem slegin hefur verið á uppboði var seld hjá Sotheby‘s í Hong Kong fyrir helgi. Um er að ræða sex lítra kristalsflösku af skoska einmöltungsvískíinu Macallan „M“ Decanter Imperiale.

Flaskan var seld fyrir 4,9 milljónir Hong Kong dollara (HKD) eða sem svarar rúmlega 72,8 milljónum króna.

Í umfjöllun danska viðskiptaritsins Børsen er verðið sagt endurspegla mjög mikla eftirspurn í Asíu eftir mjög góðum viskíum, en þar eru veigarnar í flokki með fjárfestingarkostum á borð við rándýr vín og fasteignir.

„Þegar fjárfest er í viskíi snúast viðskiptin um gæði og fágæti varningsins. Í þessu tilviki Macallan er um að ræða sérhannaða flösku frá franska glerframleiðandanum Lalique og það ýtir undir betra verð,“ er haft eftir Robert Sleigh, yfirmanni vínsöludeildar Sotheby‘s í Hong Kong.

Fyrra uppboðsmet fyrir viskíflösku hljóðaði upp á sem svarar rúmum 53,3 milljónum króna, en það var einnig fyrir flösku frá Macallan.

Børsen bendir á að þó að um háar upphæðir sé að ræða þá sé þarna langt því frá hæsta verð sem greitt hefur verið fyrir viskíflösku.

Bent er á að viskíið Isabella's Islay í sérhannaðri kristalskaröflu settri hvítagulli auk 8.500 demanta og 300 rúbína hafi verið seld á 6,2 milljónir Bandaríkjadala, eða sem svarar rúmum 719 milljónum króna.