Djúpt snortin yfir viðbrögðunum

„Það var mjög gaman að fá símtalið og ég var djúpt snortin yfir viðbrögðum starfsfólks leikhússins þegar stjórnin tilkynnti að ég fengi stöðuna,“ segir Kristín Eysteinsdóttir leikstjóri, en tilkynnt var í gær að hún myndi taka við af Magnúsi Geir Þórðarsyni sem borgarleikhússtjóri.

„Ég er að taka við mjög góðu búi,“ segir Kristín, og segir sig ætla að halda áfram á sömu braut, þó með einhverjum áherslubreytingum.

„Næsta leikár hefur þegar verið skipulagt og við komum til með að halda okkur við það að mestu leyti.“

Kristín vill efla íslenska leikritun og opna leikhúsið almenningi í auknum mæli.

„Ég ætla að opna anddyrið og hér verður starfrækt kaffihús og bar, þar verður hægt að kaupa handrit og leikhúsbækur. Svo erum við með nýja fræðsludeild sem ég kem einnig til með að efla enn frekar,“ segir Kristín og bætir við að hún vilji setja upp fleiri íslensk, frumsamin verk og styrkja þannig höfundastarfið í leikhúsinu.

„Ég mun leggja mesta áherslu á fólkið í leikhúsinu og að búa til gott og faglegt leikhús.“

Á annan tug manna sóttu um stöðu leikhússtjóra Borgarleikhússins en eins og kunnugt er sótti fráfarandi leikhússtjóri, Magnús Geir, um stöðu útvarpsstjóra og fékk á dögunum. Nokkrir umsækjendur óskuðu nafnleyndar, að sögn Þorgerðar Katrínar Gunnarsdóttur stjórnarformanns Leikfélags Reykjavíkur.