Er ekki smeykur en er alltaf á varðbergi

„Það byggist auðvitað upp spenna eftir því sem nær dregur en við erum alltaf frekar rólegir,“ segir Haraldur Dean Nelson, faðir og umboðsmaður Gunnars Nelson, en þeir feðgar voru afar rólegir og yfirvegaðir er Fréttablaðið eyddi dágóðum tíma með þeim í gær.

Þeir eru greinilega orðnir vanir þessum undirbúningi og taka öllu áreitinu og öðru sem fylgir með jafnaðargeði.

„Gunni er auðvitað einstaklega afslappaður en ég er stundum pínulítið stressaður og það byggist upp er nær dregur bardaga. Þegar við göngum síðan inn í átt hringnum þá fer stressið úr mér og maður nýtur stundarinnar. Auðvitað er samt spenna að horfa á strákinn sinn í búrinu,“ segir Haraldur en hvernig slær föðurhjartað er hann sér soninn labba inn í búrið í bardaga?

„Ég er mjög stoltur af Gunnari. Hvernig honum gengur og hvað hann leggur á sig. Ég er ekki síst stoltur af því hvernig einstaklingur hann er. Tilfinningin er því fyrst og fremst stolt.“

Það eru auðvitað mikil átök í MMA en Haraldur segir hættuna í þessari íþrótt ekkert vera mikið meiri en í mörgum öðrum íþróttum.

„Allir foreldrar eru auðvitað hræddir um börnin sama í hverju þau eru. Þetta er íþrótt og ég þekki hana vel. Ég veit hver hættan og hvað er ofmetið sem hætta. Ég geri mér grein fyrir því að það er ákveðin hætta sem fylgir svona sportum. Rétt eins og kappakstri, skíðastökki eða hverju sem er þar sem er hraði og harka. Þá er maður auðvitað pínu smeykur en þar sem ég þekki íþróttina vel þá líður mér ekki eins illa og margir halda. Ég myndi því ekki segja að ég væri hræddur en ég er alltaf pínu á varðbergi.“

Blandaðar bardagalistir, eða MMA, er enn ung íþrótt og þó svo Íslendingar séu yfir sig hrifnir af Gunnari eru enn ákveðrnir fordómar í garð íþróttarinnar á Íslandi. Þeir stafi þó að mörgu leyti af þekkingarleysi.

„Það eru fordómar en sem betur fer dregur úr þeim. Ég skil það vel að sumir hafi fordóma. Það eru fordómar gagnvart öllu og oftar en ekki þröngur og lítill hópur sem er stundum svolítið hávær. Það sáum við meðal annars eftir síðasta bardaga Gunnars. Ég skil vel að svona harðgert sport sé fyrir alla en fólk getur ekki skrifað um það sem það þekkir ekki. Það væri álíka og ef ég ætlaði mér að skrifa ritdóm um bók eftir að hafa skoðað kápuna. Það eru ekki góð vinnubrögð.“

Gunnar Nelson mætir Zak Cummings í Dublin á laugardagskvöld.  Þessi stórbardagi verður í beinni á Stöð 2 Sport og hefst útsending kl. 19:00.  Fáðu þér áskrift á www.365.is.