Styðja við menningu í nafni Snorra

Alison Finlay, prófessor í enskum og íslenskum miðaldabókmenntum við Lundúnaháskóla, Oleksandr Mykhed, dósent í ritlist við Taras Shevchenco-þjóðarháskólann í Kænugarði, og Rasa Baranauskiené, lektor í sænsku og íslensku við Vilníusháskóla, hlutu styrki úr sjóði kenndum við Snorra Sturluson.

Styrkinn eiga þau að nota til að ferðast hingað til Íslands og dvelja hér í minnst þrjá mánuði á næsta ári; Finley til að vinna að þýðingu á Sturlungasögu á ensku, Mykhed til að skrifa bók um samtímamenningu hér á landi og Baranauskiené til að þýða Njálu á litháísku.

Í tilefni af 750. ártíð Snorra Sturlusonar, 23. september 1991, ákvað ríkisstjórn Íslands að efna til styrkja sem kenndir yrðu við nafn hans. Þetta árið bárust 62 umsóknir frá 29 löndum.

Í úthlutunarnefnd eru Úlfar Bragason rannsóknarprófessor, Ásdís Egilsdóttir prófessor og Pétur Gunnarsson rithöfundur.