Guðjón Valur ekki með af persónulegum ástæðum

Landsliðsfyrirliðinn Guðjón Valur Sigurðsson var ekki á æfingu landsliðsins í dag.

„Hann er ekki með af persónulegum ástæðum. Hann flaug til Spánar í morgun til móts við fjölskyldu sína," segir Aron Kristjánsson landsliðsþjálfari.

Þjálfarinn býst þó við því að fá fyrirliðann sinn aftur um borð í hópinn fljótlega.

„Við reiknum með því að hann komi aftur til móts við hópinn í Danmörku um helgina að öllu óbreyttu."

Landsliðið heldur utan á morgun en framundan eru þrír leikir á æfingamóti.

Ísland spilar gegn Svíum í Svíþjóð á föstudag og svo eru leikir gegn Dönum og Slóvenum í Danmörku yfir helgina.