Aron Rafn: Gaui er búinn að tala um að hann geti þetta ennþá

Markvörðurinn Aron Rafn Eðvarðsson stóð sig mjög vel þegar hann kom inná í leiknum gegn Alsír í gær.  Hann varði 6 af 9 skotum á lokakaflanum þegar Íslendingar náðu að sigla sigrinum í höfn. Aron Rafn bíður spenntur eftir leiknum við Frakka en Arnar Björnsson hitti á hann í dag.

„Ef við ætlum að byrja eins og við byrjuðum í gær, þá verður þetta erfiður leikur. Við hlökkum til að spila þennan leik því það er alltaf gaman að spila á móti þeim," segir Aron Rafn.

Er Aron Rafn eitthvað farinn að stúdera franska liðið?

„Já en það er ekki langt síðan að síðasti leikur kláraðist og við þurfum fyrst að melta hann en við byrjuðum að kíkja aðeins á þá í gærkvöldi“.

Hvaða skot viltu ekki fá á þig?

„Þetta er erfið spurning.  Þeir eru með hörkugóða leikmenn í öllum stöðum og það skiptir ekki máli hvaða leikmenn eru að spila.  Þannig að það er eiginlega ekki hægt að svara þessari spurningu," segir Aron.

    

Hvernig var að sitja á bekknum í gærkvöldi og horfa á markatöluna, 0-6?

„Ég var nú bara furðu rólegur held ég.  Við vorum búnir að klúðra hverju dauðafærinu á fætur öðru og markvörður Alsír var að verja eða öllu heldur að skjóta í hann.  Svo skutum við framhjá og langt yfir en ég vissi að þetta myndi koma. Það er ekki gott að eiga góða byrjun og slæman endi.  Við sýndum að við vorum slæmir í byrjun en góðir í lokin og unnum öruggan sigur," segir Aron Rafn.

    

Aron er sammála því að liðið megi ekki byrja jafn illa gegn Frökkum á morgun. „Það er mjög mikilvægt að byrja vel og halda það út leikinn, sérstaklega á móti liði eins og Frökkum sem eru duglegir að refsa," segir Aron.

Getur Karabatic skotið ennþá á markið?

„Já Gaui er búinn að tala um að hann geti þetta ennþá en það verður að koma í ljós á morgun," sagði Aron Rafn en það má sjá allt viðtal Arnars Björnssonar við hann með því að smella hér fyrir neðan.