Guðjón Valur kominn til strákanna í landsliðinu

Guðjón Valur Sigurðsson, fyrirliði íslenska handboltalandsliðsins, var ekki með liðinu á æfingamótinu í Danmörku um helgina af persónulegum ástæðum.

Guðjón Valur ætlaði alltaf að hitta liðið eftir mótið og hann lenti í Danmörku í dag sem þýðir að reyndasti leikmaður liðsins er klár í slaginn á HM í Katar.

Stefán Rafn Sigurmannsson spilaði mjög vel í forföllum Guðjóns Vals en íslenska liðið endaði í þriðja sæti á mótinu. Liðið vann leik sinn á móti Dönum, gerði jafntefli við Slóvena og tapaði fyrsta leiknum á móti Svíum en í þeim leik vantaði marga lykilmenn.

Einar Þórvarðarson, framkvæmdastjóri HSÍ, staðfesti við Vísi í kvöld að Guðjón Valur væri kominn til móts við liðið og allur hópurinn væri nú sameinaður á ný.

Guðjón Valur flaug frá Barcelona til Kaupmannahafnar í dag og er klár fyrir heimsmeistaramótið sem hefst með leik á móti Svíum á föstudagskvöldið. Þetta eru mjög góðar fréttir enda Guðjón Valur leiðtogi og lykilmaður í liðinu.

Íslenska liðið flýgur síðan til Katar í fyrramálið en liðið mætir til Katar rúmum þremur sólarhringum fyrir fyrsta leik.