„Allir í Katar vita hvernig þetta virkar“

Mimi Kraus átti í athyglisverðum samskiptum við leigubílsstjóra í Doha, eftir því sem eftir honum var haft í þýskum fjölmiðlum í gær.

Kraus, sem leikur með þýska landsliðinu í handbolta, var í leigubíl með eiginkonu sinni í Doha í gær þegar bílstjórinn spurði hann hvort hann væri frá Þýskalandi.

„Þið voruð að spila við Katar? Ekki segja mér hvernig leikurinn fór. Þið töpuðuð og dómarinn dæmdi gegn ykkur?“ mun leigubílsstjórinn hafa sagt við Kraus sem spurði á móti hvernig hann vissi þetta.

„Það vita allir í Katar hvernig svona hlutir ganga fyrir sig í þessu landi,“ sagði bílstjórinn þá samkvæmt frásögn Kraus í þýskum fjölmiðlum.

Katar mætir í kvöld Póllandi í undanúrslitum HM í handbolta. Leikurinn hefst klukkan 15.30.