Hvað er svona merkilegt við það? hlaut Einarinn á Skjaldborgarhátíðinni

Heimildarmyndin Hvað er svona merkilegt við það?, eftir Höllu Kristínu Einarsdóttur, hlaut áhorfendaverðlaunin Einarinn á Skjaldborgarhátíðinni á Patreksfirði um liðna helgi.

Myndin fjallar um það þegar íslenskar konur ákváðu – í kjölfarið á róttækri og litríkri kvennabaráttu -  að hasla sér völl á hinu pólitíska sviði. Þær stofnuðu Kvennaframboð til borgarstjórnar og síðar Kvennalistann sem átti fulltrúa á Alþingi í 16 ár.

Myndin hlaut góðar viðtökur á hátíðinni og voru þær Halla Kristín Einarsdóttir leikstjóri og Hrafnhildur Gunnarsdóttur framleiðandi klappaðar upp af áhorfendum eftir sýningu.

Einarinn, verðlaunaskjöldur Skjaldborgarhátíðarinnar er smíðaður af Einari Skarphéðinssyni smíðakennara á Patreksfirði og heitir jafnframt í höfuðið á honum. Einar smíðar gripinn á hverju ári af mikilli natni og velur sérstaklega efniviðinn í hann.

Hvað er svona merkilegt við það - Kynningarstikla from Krumma films on Vimeo.