WOW fundar vegna flugfreyju í flugi Ásmundar Einars

WOW Air mun funda í dag vegna frétta þess efnis að þingmaðurinn Ásmundur Einar Daðason hafi verið undir áhrifum áfengis og kastað upp á farþega í flugi til Washington DC á dögunum. Sjálfur neitar Ásmundur því að hafa verið ölvaður.

Hins vegar hafa bæði farþegi í flugvélinni og ónafngreind flugfreyja fullyrt að þingmaðurinn hafi verið fullur. Tinna Jóhannsdóttir, farþegi í vélinni, sagði í viðtali við Vísi í gær að Ásmundur hefði kastað upp á sig.

„Hann bara stóð ekki í lappirnar, hann þurfti að styðja sig við staur þarna hjá vegabréfaeftirlitinu,“ segir Tinna. „Ég sá líka að flugfreyjurnar voru alltaf þarna. Hann var pissfullur bara, þetta var engin magakveisa. Það er bara kjaftæði.“

Tinna segist hafa spurt flugfreyjur í borð í flugvélinni út í ástand þingmannsins eftir að þingmaðurinn ældi á hana. Þær hafi sagt henni að Ásmundur hafi verið búinn að drekka áfengi alla leiðina. Tinna fór þó ekki verst út úr öllu saman því Bandaríkjamaður nokkur fékk að hennar sögn langstærstan hluta ælunnar yfir sig og þurfti að hafa fataskipti.

Hún er hneyksluð á því að þrátt fyrir allt hafi þingmaðurinn ekki beðist afsökunar. „Hann yrti ekki á fólk,“ segir Tinna um viðbrögð Ásmundar Einars.

Mjög alvarlegt mál

Fréttanetið hefur eftir ónafngreindi flugfreyju að uppákoman sé einhver sú vandræðalegasta sem hún hafi lent í.

,,Við sáum strax að hann var töluvert drukkinn þegar hann kom um borð og við fylgdumst vel með honum. Það er náttúrulega erfitt að díla við svona hluti þegar um er að ræða virðulegan þingmann,” segir flugfreyjan við Fréttanetið. Hún vilji ekki koma fram undir nafni enda ríki þagnarskylda í starfi þeirra hjá WOW air.

Svanhvít Friðriksdóttir, upplýsingarfulltrúi WOW Air, segir málið í skoðun hjá fyrirtækinu.

„Þetta er mjög alvarlegt mál,“ segir Svanhvít sem minnir á að starfsmönnum sé ekki heimilt að tjá sig um einstaka farþega í ferðum flugfélagsins. Fundað verði hjá fyrirtækinu í dag vegna málsins.

Netverjar hafa farið mikinn á Twitter eftir fréttaflutning af málinu. Er merkið #ásiaðfásér notað og koma skot, misfyndin úr öllum áttum eins og sjá má hér að neðan.

Steinum kastað úr glerhúsi?

Fréttastofa hefur seinni hluta dags í gær og frá því snemma í morgun reynt að ná tali af Ásmundi Einari en án árangurs. Hann fullyrti hins vegar í samtali við DV í gærmorgun að hann hefði fengið magakveisu þennan dag og ekki haldið neinu niðri. Fyrirhuguð væri heimsókn til læknis í vikunni.

Nútíminn hafði svo heimildir fyrir því að þingmaðurinn hefði sagst hafa drukkið ofan í svefnlyf í vélinni. Það væri skýring hans á ástandi sínu.

Atli Már Gylfason, blaðamaður á DV sem flutti fyrstu frétt af málinu í gærmorgun, lýsti samskiptum sínum við Vilhjálm Bjarnason, þingmann Sjálfstæðisflokksins á Facebook í morgun. Vilhjálmur var einn tíu þingmanna í utanríkismálanefnd Alþingis sem fóru í umrædda ferð til Washington.

Segir Atli að Vilhjálmur hafi fullyrt við sig að ekkert hefði gerst um borð.