Ísland fékk tvenn verðlaun í keppni með loftskammbyssu á Smáþjóðaleikunum í dag.
Þeir Ívar Ragnarsson og Thomas Viderö voru í harðri samkeppni um gullið við Boris Jeremenko frá Mónakó sem sýndi stáltaugar í síðustu umferðunum og tryggði sér sigur.
Ívar endaði í öðru sæti með 190,7 stig, 2,9 stigum á eftir Jeremenko. Viderö, sem vann þessa keppni í Lúxemborg fyrir tveimur árum, varð þriðji með 171,7 stig.
Alls voru átta keppendur í úrslitum og datt einn keppandi úr leik eftir hverja umferð. Ívar og Thomas voru í forystu strax frá upphafi en Jeremenko var ávallt skammt undan.
Eftir fyrstu umferðina fengu keppendur aðeins tvö skot í hverri umferð og var því hvert þeirra afar dýrmætt. Það var svo í fjórðu umferð að Jeremenko náði fullkomnu skoti sem gefur 10,9 stig og komst hann þar með upp í efsta sæti.
Ívar var skammt undan en Thomas drógst á eftir. En Jeremenko sýndi miklar stáltaugar og hélt áfram að skjóta yfir 10 stigum í síðustu umferðunum. Að sama skapi fóru taugarnar að láta til segja hjá Ívari sem var undir níu stigum í þremur af fjórum síðustu skotunum sínum.
Ívar var næstum búinn að missa silfrið til Thomasar en allt kom fyrir ekki.
Þess ber að geta að Ólympíufarinn Ásgeir Sigurgeirsson keppir ekki á Smáþjóðaleikunum þar sem hann undirbýr sig nú fyrir keppni á heimsbikarmóti þar sem hann stefnir að því að tryggja sér þátttökurétt á Ólympíuleikunum í Ríó.
Brons og silfur í keppni með loftskammbyssu
