Ennþá góð vikuveiði í laxveiðiánum

Þrátt fyrir að ágúst sé senn á enda er ennþá feyknagóð vikuveiði í laxveiðiánum og í raun eru sumar þeirra að skila veiði eins og veiðimenn eiga von á í byrjun ágúst.

Bæði er ennþá lax að ganga og tölurnar úr ánum endurspegla á engan hátt síðsumarsveiðiheldur þvert á móti. Sem dæmi um þetta, ef við tökum bara vikuveiðina úr tíu aflahæstu ánum í síðustu viku, veiddust 742 laxar í Miðfjarðará sem er ótrúleg tala en áin er alveg pökkuð af laxi. Ytri Rangá var með 735 laxa, Blanda með 286 laxa, Laxá í Dölum með 281 lax, Eystri Rangá með 194 laxa, Þverá og Kjarrá með 167 laxa, Víðidalsá með 163 laxa, Langá á Mýrum með 159 laxa, Jökla með 155 laxa og heildarveiðiuppá 580 laxa sem er nýtt met þar á bæ og að lokum Norðurá með 144 laxa.

Það styttist í lookatölur í nokkrum ám en margar árnar eiga þó ennþá 3-4 vikur eftir af veiði svo tölurnar af lista Landssambands Veiðifélaga sem eru vikulega teknar saman af Þorsteini á Skálpastöðum og má finna hér eiga ennþá eftir að hækka. Það sem er að vekja athygli veiðimanna er hversu góðar göngur eru ennþá í sumar árnar miðað við árstíma en í nokkrum ánum eru varla ennþá farnir að veiðast legnir laxar af neinu ráði. Það er því deginum ljósara að haustveiðin, verði veður ágætt, gæti orðið alveg frábær þetta sumarið.