Steele enn í forystu á Silverado vellinum

Bandaríkjamaðurinn Brendan Steele leiðir enn á Frys.com mótinu en eftir tvo hringi er hann á 11 höggum undir pari.

Steele lék hringinn í gær á 70 höggum eða tveimur undir pari sem dugði honum til þess að halda forystunni efir að hafa jafnað vallarmetið á Silverado vellinum á fyrsta hring.

Nokkrir kylfingar deila öðru sætinu á níu höggum undir pari en aðstæður á öðrum hring í gær voru töluvert erfiðari en á þeim fyrsta.

Rory McIlroy er meðal þátttakenda þar sem hann reynir að koma sér í betra keppnisform eftir meiðsli sem hann varð fyrir í sumar en hann er jafn í 19. sæti á fimm höggum undir pari.

Hann átti mjög erfitt uppdráttar á öðrum hring þar sem hann missti hvert fuglapúttið á fætur öðru en með góðum hring í kvöld gæti hann blandað sér í baráttuna um sigurinn.

Þriðji hringur verður í beinni útsendingu á Golfstöðinni frá klukkan 21:00 í kvöld.