Færðu heila umferð til að vinna sér inn meiri tíma

Norðmenn verða að komast í gegnum umspil ætli þeir sér að vera með á EM eins og Íslendingar. Norðmenn hafa nú áhyggjur af því að mótherjar þeirra séu búnir að búa sér til forskot fyrir komandi leiki.

Noregur og Ungverjaland mætast seinna í þessum mánuði í tveimur umspilsleikjum um sæti í úrslitakeppni Evrópumótsins í fótbolta sem fer fram í Frakklandi næsta sumar. Nú eru bara tveir dagar í fyrri leikinn sem fer fram í Osló í Noregi.

Ungverjar hafa ekki komist á stórmót í þrjá áratugi eða síðan að þeir voru með á HM í Mexíkó 1986. Þeir voru síðast í úrslitakeppni EM árið 1972.

Ungverska deildin er í fullum gangi og það átti að fara fram leikir í deildinni um næstu helgi. Ungverska sambandið tók sig hinsvegar til að frestaði öllum leikjunum frá 7. nóvember til 2. desember. Dagblaðið segir frá þessu.

Þetta gerði stjórn sambandsins til þess að tryggja það að leikmenn landsliðsins fengju sem mestan tíma til að undirbúa sig fyrir Noregsleikina.

 

„Vanalega fæ ég bara þrjá daga með leikmönnunum en núna fáum við tíu daga saman. Leikmennirnir sem spila utan Ungverjalands koma seinna til móts við liðið en það að allir hinir fá svona marga daga saman mun hjálpa okkur mikið," sagði Bernd Storck, þýskur landsliðsþjálfari Ungverja, í samtali við NRK.

Þetta verða fyrstu umspilsleikir Ungverja síðan 1997 og þetta gamla stórveldi í heimsfótboltanum ætlar að gera allt til þess að koma landsliðinu aftur inn á stórmót.

Leikirnir fara fram 12. og 15. nóvember og það lið sem hefur betur samanlagt kemst á EM í Frakklandi.

Norðmenn geta kannski huggað sig við það að það er kannski ekki gott að bíða of lengi fyrir svona mikilvæga leiki því þá gæti spennustigið farið að verða of mikið þegar loksins kemur að leiknum.