Erlingur fer ekki með Íslandi á HM

Erlingur Richardsson, annar af tveimur aðstoðarþjálfurum íslenska landsliðsins í handbolta, fer ekki með liðinu á HM í Katar þar sem hann á ekki heimangengt vegna starfs síns hjá austurríska úrvalsdeildarliðinu West Wien.

„Því miður verður hann ekki með,“ segir Einar Þorvarðarson, framkvæmdastjóri HSÍ, í samtali við Fréttablaðið, en Erlingur mun samt sem áður koma að leikgreiningu Íslands á HM.

„Menn geta alveg unnið leikgreiningar á milli landa þannig að Erlingur mun koma að þessu, en því miður getur hann ekki farið með okkur,“ segir Einar.

Erlingur var á bekknum í báðum leikjum Íslands gegn Þýskalandi í Laugardalshöllinni sem fram fóru á sunnudag og mánudag og þá verður hann eini aðstoðarþjálfarinn á fjögurra landa mótinu sem hefst á föstudaginn.

„Gunnar Magnússon er að stýra U21 árs landsliðinu í forkeppni HM, en riðillinn okkar er spilaður hérna heima. Erlingur verður því með Aroni í Svíþjóð og Danmörku en fer svo til Austurríkis. Gunnar kemur aftur til móts við liðið á mánudaginn,“ segir Einar.

Erfitt verkefni er fyrir höndum hjá Gunnari í forkeppni U21 árs liðsins, en það mætir Noregi, Eistlandi og Litháen og fara allir leikirnir fram í Strandgötu í Hafnarfirði.

„Það er aðeins eitt lið af þessum fjórum sem vinnur sér inn sæti á HM í Brasilíu í sumar. Við erum komnir með 19 ára landsliðið á HM í Rússlandi og þarna er möguleiki á að koma 21 árs liðinu á HM líka. Þetta er erfiður riðill því Noregur og Eistland voru bæði á síðasta HM, en þangað komumst við ekki,“ segir Einar Þorvarðarson.