Fjörug og fyndin en líka sorgleg á köflum

Freyja er tíu ára nemandi í Vesturbæjarskóla en er þessa dagana stödd í sveitinni í Skagafirði hjá afa sínum og ömmu. Þau búa á bænum Flugumýrarhvammi sem er meðalstórt mjólkurbú og Freyja hjálpar til í fjósinu. En áður en hún fór í sveitina fór hún í bíó og sá myndina Inside Out.

Um hvað fjallar myndin Inside Out?

Hún fjallar um tilfinningar ákveðinnar stúlku. Þetta eru fimm tilfinningar sem eru aðalpersónurnar í myndinni. Þær heita Ofsi, Glöð, Leiði, Ótti og Andstyggð. Stelpan er eiginlega ekki aðalpersónan.

Hvernig eru þessar tilfinningar?

Glöð er sú sem sér um allt sem kætir stelpuna. Ofsi er mjög oft pirraður og stýrir reiðinni. Ótti er alltaf hræddur og ofverndar stúlkuna. Leiði stjórnar því hvað gerir stúlkuna leiða, eins og til dæmis að hún þurfi að flytja. Fimmta tilfinningin, Andstyggð, er alltaf í gelgjukasti. Hún ákveður hvað henni finnst vont og hjálpar stelpunni að vita hverjir eru kúl og hverjir eru ömurlega leiðinlegir.

Hvaða persóna finnst þér skemmtilegust?

Ofsi. Hann er rosalega fyndinn og ákveðinn.

Hvernig mynd er þetta?

Hún er spennandi og fyndin en samt ekki beint gamanmynd. Það er fjör í henni en líka kaflar sem eru sorglegir.

Myndir þú mæla með þessari mynd?

Já.

Fyrir hvaða aldur?

Svona fimm til tólf ára. Það eru flókin atriði í henni og þetta er krakkamynd sem passaði vel fyrir litla bróður minn (5 ára) og mig. Svo er þessi mynd örugglega mjög góð fyrir fólk sem dáir hokkí, því stelpan æfir hokkí. Þetta eru svona aðstæður sem gætu verið í Kanada.