Vefsala SVFR opnuð

Nú hefur verið opnað fyrir vefsölu á veiðisvæði Stangaveiðifélags Reykjavíkur en eftir forúthlutun og frágang umsókna sést að mun meira var sótt um en á síðasta ári.

Það sést vel þegar lausar stangir eru skoðaðar á vinsælum veiðisvæðum miðað við hvernig staðan var á sama tíma í fyrra. Það má nefna til dæmis flaggskip félagsins, Langá á Mýrum, en þar eru aðeins lausar stangir á stangli fyrir utan eitt holl um mánaðarmót ágúst september sem er óselt en það verður það varla lengi.  Heildarveiðin í ánni í fyrra var 2.616 laxar á fyrsta sumrinu sem áinn var aðeins veidd á flugu og sú ákvörðun hefur greinilega dregið að veiðimenn sem vilja aðeins veiða í ám sem eru "fly-only" og þá sérstaklega erlendir veiðimenn.

Nokkuð er laust í júlí á Bíldsfellinu í Soginu sem er alveg ótrúlegt enda er svæðið eitt það vinsælasta í ánni en það verður þó líklega fljótt að fara til utan félagsmanna.  Meira úrval er á silungasvæðum SVFR en þau leyfi fara gjarnan mun jafnar heldur en leyfin í laxveiðiárnar. Það sem vekur einnig eftirtekt er að finna lausar stangir í september í Elliðaánum en það er geysilega skemmtilegur tími þar sem besta svæðið er flugusvæðið ofan við Árbæ og á þessum tíma er fiskurinn oft ansi tökuglaður. Þeir utan félagsmenn sem gátu ekki tekið þátt í úthlutun í Elliðaárnar verða þó líklega fljótir að grípa bestu dagana þar.