„Menn sitja þá bara eftir með skömmina“

Bjarni Benediktsson fjármála- og efnahagsráðherra segir óskiljanlegt að á sama tíma og tryggingafélögin boði iðgjaldahækkanir hyggist þau greiða út arð sem sé langt umfram hagnað síðasta árs. Eigendur tryggingafélaganna þurfi að sitja eftir með skömmina af því.

Þetta kom fram í máli hans í óundirbúnum fyrirspurnatíma á Alþingi í dag við fyrirspurn frá Helga Hjörvari, þingmanni Samfylkingarinnar, sem spurði út í viðhorf ráðherrans í garð arðgreiðslna tryggingafélaganna, og hvort þær samræmdust lögum og reglum. Þá vildi hann jafnframt vita hvort ríkisstjórnin ætlaði að grípa til aðgerða.

„Eftir því sem Fjármálaeftirlitið hefur gefið út nú þegar þá eru vátryggingafélögin, þrátt fyrir arðgreiðslurnar, fjárhagslegar stofnanir sem standa vel undir þeim skuldbindingum sem þær hafa á sit tekið. Það breytir því ekki að okkur er misboðið þegar menn ganga svona fram gagnvart neytendum og sérstaklega er það þannig þegar um er að ræða lögboðnar tryggingar. Tryggingar sem við með lögum ákveðum að fólk þurfi að taka. Auðvitað setur það málið í sérstakt ljós,“ sagði Bjarni.

Endurheimta þurfi traustið

Þá sagði hann að endurheimta þurfi það traust sem rofnaði í efnahagshruninu. „Maður einfaldlega kallar eftir því að tillögur sem þaðan berast um rekstraráform um hvernig ráðstöfun hagnaðar eða eigna fer fram sé í eðlilegum takti við það ákall sem við vitum að er enn í samfélaginu eftir þá atburði sem nú eru nýskeðir,“ sagði Bjarni.

Sjá einnig:Sigmundur vill skoða hvort lagabreytinga sé þörf

„Ég get ekki annað en tekið undir með háttvirtum þingmanni að það hlýtur að hljóma illa í eyrum allra landsmanna að menn á sama tíma boði iðgjaldahækkanir en ætli að taka út arð sem er langt umfram hagnað síðastliðins árs. Þetta er fyrir mig eiginlega alveg óskiljanlegt. En menn sitja þá bara eftir með skömmina af því.“

Bjarni sagði ekki líkur á að ríkisstjórnin grípi til aðgerða í þessum málum. „Eftir því sem ég kemst næst og á grundvelli þeirra laga og reglna sem um þetta gilda, og eftir samskipti ráðuneytisins við Fjármálaeftirlitið, og eftir að hafa lesið yfirlýsingar Fjármálaeftirlitsins, þá eru í sjálfu sér ekki  neinar lagaheimildir til staðar til að grípa inn í tillögur um arðgreiðslur, en ég held við þurfum líka að gæta þess að gera greinarmun á því þegar menn eru að taka út arð sem er langt umfram hagnað og í öðrum tilvikum þegar menn eru að ráðstafa hagnaði síðasta árs.“

Lagabreytinga sé hugsanlega þörf

Sigmundur Davíð Gunnlaugsson forsætisráðherra sagði hins vegar að skoða þurfi hvort lagabreytinga sé þörf. Um mikið áhyggjuefni sé að ræða.

 „Það er alls ekki í anda laga um vátryggingarstarfsemi að mínu mati og sérstakt áhyggjuefni þegar um er að ræða lögbundnar skyldutryggingar sem menn verða að taka. Það þurfa að gilda sérstakar reglur um fjármála og tryggingafyrirtæki. Tryggingafyrirtæki eru á vissan hátt fjármálafyrirtæki þannig að við þurfum að skoða hvort þörf sé að breyta reglum til þess að koma í veg fyrir óæskilega hegðun á þessum markaði,“ sagði Sigmundur Davíð í óundirbúnum fyrirspurnatíma á Alþingi í dag.