Stefna að því að koma Íslendingum á flot í sumar

Þrír ungir Íslendingar stefna að því að opna fyrstu flotstofu landsins í sumar og er söfnun hafin á vefsíðunni Karolina Fund.  Á stofunni mun fólk geta prufað að fljóta í söltu vatni með ljósin slökkt og ku tilfinningin svipa til þess að svífa í lausu lofti.

Þremenningarnir kynntust flotstofum í ferð til Lundúna fyrir rúmlega tveimur árum og eru yfir sig hrifnir af fyrirbærinu. Þeir segja flot af þessu tagi geta unnið bug á streitu, svefnleysi, kvíða og jafnvel hjálpað til við íþróttameiðsli.​

Stefán Arnórsson, einn frumkvöðlanna þriggja að baki Flotstofunni, líkir dágóðri stund í svokölluðum flottanki við það að ýta á „reset“-takkann á sjálfum sér.

„Eftir að við prufuðum þetta úti, fann ég í tvær, þrjár vikur eftir á alveg svakalegan mun á mér,“ segir Stefán. „Þetta hljómar smá „corny“ en maður tók til dæmis bara eftir því hvað Esjan er falleg þegar maður keyrir í vinnuna. Þegar skilningarvitin eru tekin af manni, þá kann maður mun betur að meta þau.“

Auglýsing frá Flotstofunni sem útskýrir hvernig flottankar virka.

Vatnið í tönkunum er um þrjátíu sentímetra djúpt og svo salt að fólk á að fljóta áreynslulaust. Hitastiginu er haldið stöðugu í 34 til 35 gráðum, sem samsvarar hitastigi húðarinnar, og gerir það þannig að verkum að eftir nokkrar mínútur hættir fólk að geta greint hvaða hluti líkamans er undir vatnsyfirborðinu. Stefán segir ekki hægt að velta sér í vatninu, þó maður sofni. 

Tankurinn er bæði ljós- og hljóðeinangraður og á hann þannig að útiloka allt áreiti. Margir sem prufað hafa flot sem þetta líkja þessu við djúpa hugleiðslu og aðrir við nokkurs konar vímu.

„Það er talað um að fimm til tíu prósent af þeim sem þetta prufa upplifi bara sitt eigið ímyndunarafl,“ útskýrir Stefán. „Það eru margir sem finna fyrir mjög blíðum ofskynjunum, sjá stjörnur eða mismunandi liti. Mín upplifun var í rauninni sú að ég rankaði við mér og mér fannst eins og lægi inni í risastóru rými, helli eða flugvélaskýli fullu af vatni.“

Aðrir notendur hafa þó fyrst og fremst áhuga á líkamlegu hliðinni og nefnir Stefán íþróttakappa á borð við glímukappann Conor McGregor og knattspyrnumanninn Wayne Rooney, sem ku eiga tæki sem þetta heima hjá sér og nota það allt að tíu sinnum á viku þegar hann er að ná sér af meiðslum.

Þremenningarnir stefna á að opna flotstofuna miðsvæðis í Reykjavík í maí eða júní næstkomandi, þá með tveimur tönkum en með möguleika á að fjölga þeim. Stefán segir aukinn áhuga á fyrirbærum eins og jóga og núvitund hér á landi skapa ákveðið markaðstækifæri fyrir flotstofu.

„Íslendingar eru loksins byrjaðir að þora að hugsa aðeins meira um sig andlega,“ segir hann. „Þannig að við höldum að það sé fullkomið að koma með þetta núna.“