Afkoma íslenskra knattspyrnuliða versnar

Afkoma knattspyrnuliða sem spiluðu í tveimur efstu deildum á Íslandi árið 2015 versnaði milli ára. Í þinggerð ársþings KSÍ kemur fram að afkoma liðanna 24 hafi verið neikvæð um 53 milljónir króna árið 2014 miðað við jákvæða afkomu um 65 milljónir árið 2013.

„Þetta er þróun til þess að hafa áhyggjur af,“ sagði Geir Þorsteinsson, formaður KSÍ, í ávarpi sínu á þinginu.

Heildartekjur félaganna jukust um 60 milljónir króna og voru tæplega 2,6 milljarðar króna. Heildarútgjöld félaganna hækkuðu á móti um 130 milljónir króna á milli ára og voru alls 2,65 milljarðar króna.

Þá kemur fram að KSÍ eigi von á að fá um átta milljónir evra, um 1,1 milljarð króna, frá Knattspyrnusambandi Evrópu, vegna þátttöku karlalandsliðsins í Evrópumótinu í knattspyrnu. Rekstraráætlun KSÍ gerir ráð fyrir rúmlega 600 milljóna hagnaði á þessu ári. Af því eiga um 300 milljónir króna að renna til aðildarfélaga KSÍ en ekki liggur fyrir með hvaða hætti greiðslunni verður skipt milli félaganna. Auk þess hækkar barna- og unglingastyrkur um þrjátíu prósent og styrkur vegna leyfiskerfis hækkar um fimmtán prósent.

Fyrir leyfisferli ársins 2014 fyrir tvær efstu deildirnar voru teknar upp viðmiðunarreglur um jákvæða eiginfjárstöðu og að heildarskuldir og skuldbindingar væru ekki hærri en 50% af meðaltali rekstrartekna undanfarinna þriggja ára. Af þeim tólf félögum sem léku í efstu deild karla árið 2015 stóðust sjö þessar kröfur, tvö stóðust hvoruga kröfuna, tvö ekki kröfu um hámarksskuldabyrði og eitt ekki kröfuna um jákvætt eigið fé. Af tólf félögum sem léku í fyrstu deild í fyrra stóðust sex kröfurnar, tvö stóðust hvoruga kröfuna en fjögur ekki kröfuna um jákvætt eigið fé. Heildarskuldir félaganna 24 í árslok 2014 voru um 500 milljónir króna og hækkuðu um fjörutíu milljónir króna á milli ára.