Fiskaflinn í febrúar tæp 89 þúsund tonn

Heildarafli íslenskra fiskiskipa í febrúar 2016 var tæp 89 þúsund tonn, sem er 60 prósent minni afli en í febrúar 2015. Samkvæmt tölum Hagstofunnar jókst botnfiskafli um 19 prósent en uppsjávarafli dróst saman um 78 prósent, úr 182 þúsund tonnum í 39 þúsund tonn, þar af dróst loðnuafli saman um tæplega 111 þúsund tonn.

Ef 12 mánaða tímabilið mars 2015 til febrúar 2016 er borið saman við sama tíma ári áður kemur í ljós 5 prósent samdráttur í heildaraflamagni. Aflinn í febrúar metinn á föstu verði var 17,7 prósent minni en í febrúar 2015.