Fjárfest fyrir tæpa tvo milljarða í nýsköpun

Á fyrsta ársfjórðungi ársins 2016 var fjárfest fyrir 13,4 milljónir dollara, eða 1,74 milljarð íslenskra króna, í sjö nýsköpunarfyrirtækjum. Þetta kemur fram í samantekt Norðurskauts.

Fjárfest var í rúmlega tvöfalt fleiri fyrirtækjum en á sama tímabili fyrir ári síðan. Hins vegar var fjárfest fyrir mun lægri fjárhæð, sökum einnar stærðarinnar fjárfestingu á tímabilinu í fyrra.

Hæsta fjárfestingin var 7,5 milljón dollara, 922 milljóna króna, fjárfesting GluMobile í QuizUp. Þrjár fjárfestingar voru undir hálfri milljón dollara, jafnvirði 62 milljóna króna, tvær á bilinu 1,5-3 milljónir dollara, 185 til 370 milljónir króna, og ein yfir 370 milljónum króna.

Fjármagnið kom að 57 prósent hluta erlendis frá, en 43 prósent frá Íslandi. Fjárfesting GluMobile nemur hins vegar stórum hluta erlenda fjármagnsins.

Eitt fyrirtæki var selt á tímabilinu. Sænska fyrirtækið Enzymatica keypti íslenska fyrirtækið Zymetech fyrir um sjötíu milljónir sænkra króna, eða rúman milljarð íslenskra króna.