Laugar taka við af Laugarvatni

Fyrsta árs nemar komandi hausts í íþrótta- og heilsufræði við Háskóla Íslands munu stunda verklega hluta náms síns í World Class Laugum. Samningur þess efnis var undirritaður á dögunum. Þetta kemur fram í tilkynningu frá Háskóla Íslands og World Class.

Í febrúar síðastliðnum var ákveðið að flytja íþrótta- og heilsufræði frá Laugarvatni og til Reykjavíkur. Nemum á öðru og þriðja ári á brautunum munu ljúka námi sínu á Laugarvatni en nýnemar næsta skólaárs munu vera í Reykjavík. Það má því segja að Laugar taki við af Laugarvatni.

„Við erum afskaplega ánægð með þennan samning við World Class en á háskólasvæðinu er ekki að finna nægilega góða aðstöðu fyrir verklega kennslu íþrótta- og heilsufræðinema,“ segir Jóhanna Einarsdótti forseti menntavísindasviðs háskólans. „Við þurftum ekki að leita langt því bestu íþróttaaðstöðu landsins er án nokkurs vafa að finna í Laugardalnum.“

„Við hlökkum til að fá til okkar nemendur Háskólans í íþrótta- og heilsufræði. Við leggjum mikla áherslu á að fylgjast með og taka þátt í því nýjasta sem er að gerast á þessu sviði enda er það markmið okkar að stuðla að hreysti og góðri heilsu landsmanna,“ segir Hafdís Jónsdóttir eigandi World Class.