Þróuðu tæki til baráttu gegn beinhimnubólgu

„Þegar þú ert með beinhimnubólgu er gott að hita og kæla til skiptist til að minnka bólgur, en oft er þetta of mikið ferli fyrir fólk og það endar á því að nenna ekki að meðhöndla þetta. Við ákváðum því að þróa vöru sem myndi einfalda þetta fyrir alla,“ segir Olga Ýr Georgsdóttir, nemandi í viðskiptafræði við Háskólann í Reykjavík.

Olga Ýr, ásamt Þorsteini Jónssyni, Kristjáni Svani Eymundssyni, Bergdísi Maggý Bergsteinsdóttur, Jóni Garpi Fletcher og Jóhönnu Wium Pálmarsdóttur, stendur að baki vörunni Tumentes. Varan var þróuð af nemendunum, sem eru á fyrsta ári en í mismundi deildum í HR, á námskeiðinu Nýsköpun og stofnun fyrirtækja síðustu þrjár vikur.

„Þetta er púði sem er festur á þig með frönskum rennilás svo að þú getir ráðið þrýstingnum sjálfur. Svo stillirðu með fjarstýringu hversu lengi þú vilt hafa hitann og hversu háan þú vilt hafa hann,“ segir Olga Ýr. Varan verður lítil og með rafhlöðu þannig að notendur geti tekið hana með sér í göngu.

„Við erum ekki að koma með nýja leið til að tækla beinhimnubólgu, við erum bara að reyna að einfalda ferlið, þannig að það séu meiri líkur á að fólk geri eitthvað í þessu,“ segir Olga Ýr og bætir við að teymið hafi gert könnun sem sýndi að margir nenni einfaldlega ekki að meðhöndla beinhimnubólgu og hætti jafnvel að stunda hreyfingu út af bólgunni. 

Teymið er komið með prótótýpu og með allt sem það þarf til að þróa vöruna frekar. „Við erum ekki búin að fara í neina áhættuvinnu, en við erum komin með það á hreint hvernig þetta virkar og formúluna í kringum það,“ segir Olga Ýr.

Hún segir drauminn að taka verkefnið lengra. „Við erum háskólanemar á fyrsta ári þannig að þá þyrftum við að fara í eitthvað samstarf eins og staðan er núna og aðstæður eru, en það væri geggjað ef það væri hægt,“ segir Olga Ýr.

Fleiri verkefni verða kynnt í dag í lokahófi námskeiðsins í HR. Þá hefjast örkynningar kl. 15.30 og verðlaunaafhending fyrir bestu verkefnin kl. 16.30.

Fréttin birtist fyrst í Fréttablaðinu 14. maí