Íslandsbanki hagnaðist um 3,5 milljarða

Hagnaður Íslandsbanka eftir skatta var 3,5 milljarðar króna á fyrstu þremur mánuðum ársins 2016 samanborið við 5,4 milljarða króna á sama tímabili 2015. Munurinn stafar einkum af hærri tekjum í óreglulegum liðum, þ.e. hrein virðisbreyting útlána og hærri fjármunatekna, á fyrsta ársfjórðungi 2015.

Arðsemi eigin fjár var  6,9 prósent samanborið við 11,8 prósent á sama tíma 2015. Hagnaður af reglulegri starfsemi nam 3,6 milljörðum króna á fjórðungnum, samanborið við 4,4, milljarða króna á fyrsta ársfjórðungi 2015 og arðsemi eigin fjár af reglulegri starfsemi miðað við 14 prósent eiginfjárhlutfall A var 10,1 prósent samanborið við 15,0 prósent á sama tímabili 2015.

Hreinar vaxtatekjur voru 7,5 milljarðar króna sem er aukning um 22 prósent. Vaxtamunur var 2,9 prósent. Hreinar þóknanatekjur voru 3,1 milljarður króna eða  8,3 prósent aukning milli ára.; þar af var 2,6 prósent aukning hjá móðurfélaginu.

Kostnaðarhlutfall var 58,3 prósent.  Bankaskattur og einskiptiskostnaður er undanskilinn við útreikning kostnaðarhlutfalls.

Útlán til viðskiptavina jukust um 1,7 prósent eða í 677,1 milljarða króna á fyrsta ársfjórðungi. Aukningin dreifist vel á mismunandi  útlánaeiningar bankans.

Heildareignir voru 1.021 milljarðar króna í lok fyrsta ársfjórðungs samanborið við 1.046 milljarðar króna í desember 2015. Eiginfjárhlutfallið var 29,7 prósent.