Davíð segir verulega skekkju í könnun 365

„Þær koma nú hver á fætur annarri kannanirnar en sem betur fer gefst manni tími inn á milli að hitta fólk og fara á fundi. En það er enn langt til kjördags og ég held mínu striki en ég sýti það ekki að fólkið í landinu er á þessari skoðun,“ sagði Guðni Th. Jóhannesson forsetaframbjóðandi þegar hann var inntur eftir fyrstu viðbrögðum sínum við nýrri skoðanakönnun fréttastofu 365 sem birt var í kvöldfréttum Stöðvar 2 núna áðan.

Þar mælist hann með yfirburðafylgi eða 65 prósent, Davíð Oddsson er með tæplega 20 prósent fylgi, Andri Snær Magnason með tæplega átta prósent og Halla Tómasdóttir með 2,5 prósent. Þessir fjórir frambjóðendur mætast í kappræðum Stöðvar 2 í beinni útsendingu í kvöld og rætt var við þau í beinni í kvöldfréttunum áðan.

Andri Snær sagði niðurstöður könnunarinnar í samræmi við það sem verið hefur undanfarið. Halla Tómasdóttir sagðist líta svo að kosningabaráttan sé rétt að byrja núna. Hún taldi einu leiðina fyrir sig úr þessu vera upp á við. Hún sagðist ekki vilja horfa of mikið til kannanna áður en baráttan hefst og taldi hún hana vera að hefjast fyrst núna.

 

Davíð Oddsson sagði einhverja verulega skekkju vera í könnun 365 og vísaði í tvær kannanir Gallup og Félagsvísindastofnunar þar sem Guðni mælist með 57 prósent fylgi í þeim báðum.

„Ég held að það sé einhver skekkja í þessu og bind vonir við það. Ég hef byggt á því að fá eitt prósent á dag og það hefur gengið eftir fyrir utan þessa könnun núna,“ sagði Davíð og ítrekaði að of mikil skekkja væri í könnunum.

„Þær geta ekki verið báðar réttar,“ sagði hann.