Lífeyrissjóðirnir geti ekki sameiginlega keypt Arion banka

Það er ekki hægt að sætta sig við að hópur lífeyrissjóða ætli sér að eiga rúmlega 40 prósent af öllum skráðum hlutabréfum og ætli sér einnig að vera ráðandi hluthafi í stórum fjármálafyrirtækjum. Þetta segir fjármála- og efnahagsráðherra.

Eftir hrun hafa íslenskir lífeyrissjóðir orðið mjög áberandi á meðal stærri eigenda atvinnufyrirtækja en þeir eiga til að mynda um 45 prósent af skráðum hlutabréfum á markaði. Þá hefur einnig færst í vöxt að lífeyrissjóðir eigi eignarhluti í fleiri en einu fyrirtæki á sama markaði. Samkeppniseftirlitið hefur haft nokkrar áhyggjur af þessari þróun og stóð í gær fyrir umræðufundi um hvernig þetta eignarhald kemur til með að þróast næstu misserin, þegar stór skref verða stigin við losun gjaldeyrishafta.

Undanfarið hafa margir af stærstu lífeyrissjóðum landsins lýst yfir áhuga á að kaupa sameiginlega stóran hlut í Arion banka af kröfuhöfum Kaupþings. Hafa viðræður þess efnis staðið yfir frá því á seinni hluta síðasta árs.

„Ég hef verið þeirrar skoðunar að það geti ekki verið heilbrigt við þessar aðstæður að lífeyrissjóðirnir líti á sig með einhverjum hætti sem eina blokk. Og ég hef athugasemdir við það þegar menn tala opinberlega um það að þeir séu blokk af aðilum sem að séu einhvern veginn einsleitir og sjálfgefið að þeir hagi sér með sama hætti, til dæmis við kaup á stórum fjármálafyrirtækjum,“ segir Bjarni Benediktsson, fjármála- og efnahagsráðherra.

Lífeyrissjóðirnir geti ekki starfað saman með þessum hætti sem heild. Þá segir Bjarni að ef sami hópur lífeyrissjóða ætli sér að eiga rúmlega 40 prósent af öllum skráðum hlutabréfum og vilji einnig vera ráðandi hluthafi í stórum fjármálafyrirtækjum, þá sé það ástand sem að ekki sé hægt að sætta sig við.

„Á sama tíma er alveg ljóst að fjármálafyrirtækin væru kjörinn valkostur fyrir lífeyrissjóðina, svo lengi sem þeir eru ekki að starfa sem ein blokk. Og svo lengi sem þeir ætla ekki að vera á sama tíma virkir eigendur í fjármálafyrirtækjunum og á fjölmörgum samkeppnissviðum í atvinnulífinu,“ segir Bjarni.