Tuttugu milljarða viðsnúningur hjá Eyri Invest

Fjárfestingarfyrirtækið Eyrir Invest hagnaðist um 112,2 milljónir evra, 15,7 milljarða íslenskra króna, á síðasta ári. Árið 2014 tapaði félagið hins vegar 33,7 milljónum evra, 4,7 milljörðum íslenskra króna.

Heildareignir námu 454,3 milljónum evra í árslok, jafnvirði 63,4 milljarða króna.

Eigið fé nam 247,4 milljónum evra, 34,6 milljörðum króna, og eiginfjárhlutfall var 54,5 prósent. Félagið á 29 prósenta hlut í Marel og 17 prósenta hlut í Stork Technical Services í gegnum Lond Acquis­ition Luxco.

Eyrir er stærsti fjárfestir í Marel og hefur verið það frá árinu 2005. Á síðastliðnu ári hækkuðu hlutabréf í Marel um 76 prósent.

Á árinu seldi Eyrir ásamt meðfjárfestum alla hluti í Fokker Techno­logies til breska verkfræðifyrirtækisins GKN.

Í nóvemberlok náðust samningar milli Eyris Invest, Arle Capital Partners og meðfjárfesta um sölu á Stork Technical Services til bandaríska fyrirtækisins Fluor Corporation. Áætlað er að söluferlinu ljúki á fyrri helmingi árs 2016.

Fimm stöðugildi voru hjá Eyri Invest á árinu.

Landsbankinn átti í árslok 2015 23,3 prósenta hlut í Eyri en hefur auglýst hlutinn til sölu.

Þessi grein birtist fyrst í Fréttablaðinu þann 26. maí.