Háskólinn í Reykjavík og MIT í samstarf

Háskólinn í Reykjavík og atvinnu- og nýsköpunarráðuneytið munu næstu tvö ár taka þátt í alþjóðlegu samstarfsverkefni með MIT-háskólanum í Bandaríkjunum sem miðar að því að skapa ný störf og efla hagvöxt á Íslandi með nýsköpun. Þetta kemur fram í fréttatilkynningum frá HR og atvinnuvegaráðuneytinu.

Verkefnið sem um ræðir kallast REAP og er til tveggja ára. MIT hefur unnið með fjölda borga og svæða um heim allan en í þeim hópi eru Skotland, Finnland, London, Katar og Pekíng.

Verkefnið felst í greiningu á umhverfi fyrir frumkvöðla og nýsköpun hér á landi. Þegar því lýkur mun liggja fyrir aðgerðaáætlun um hvernig megi aukasamkeppnishæfni Íslands með nýsköpun

„Nýsköpun og aukin hagnýting hugvits verður grundvöllur samkeppnishæfni og lífsgæða á Íslandi í framtíðinni, eins og m.a. er bent á í skýrslu McKinsey frá 2012 um vaxtarmöguleika Íslands. Það er þess vegna mjög spennandi að hefja þetta samstarf við einn virtasta háskóla heims, sem þekktur er fyrir tækni, viðskipti og nýsköpun. Samstarfið fellur vel að stefnu HR sem leggur mikla áherslu á nýsköpun og við hlökkum til samstarfsins.“ segir Ari Kristinn Jónsson, rektor Háskólans í Reykjavík.

„Rannsóknaháskólar eiga sérstaklega mikilvægan þátt í að drífa nýsköpun og yfirfærslu þekkingar til nýrra fyrirtækja og gegna þannig lykilhlutverki í efnahagsþróun landsvæða. Fyrir fámennt land eins og Ísland gegnir Háskólinn í Reykjavík sérstaklega mikilvægu hlutverki í rannsóknum og viðskiptamenntun,“ segir Fiona Murray, aðstoðarforseti fyrir nýsköpun hjá Sloan stjórnendaskólanum hjá MIT.